खास प्रतिनिधी | मंत्रालय टाईम्स, मुंबई
लोकसभा निवडणुकीला सव्वा वर्ष उलटूनही भाजपला नवा अध्यक्ष मिळालेला नाही. महाराष्ट्रातील दिग्गज नेते देवेंद्र फडणवीस किंवा नितीन गडकरी यांच्याकडे पक्षाध्यक्ष पदाची धुरा सोपवली जाण्याची शक्यता आहे. दोन्ही नेत्यांचे राष्ट्रीय स्वयंसेवक संघाशी उत्तम संबंध आहेत.
भारतीय जनता पक्षाचे राष्ट्रीय अध्यक्ष जेपी नड्डा यांचा कार्यकाळ मागील लोकसभा निवडणुकीच्या आधीच संपला. पण निवडणूक तोंडावर असल्यानं त्यांचा कार्यकाळ वाढवला गेला. आता लोकसभा निवडणूक होऊन सव्वा वर्ष उलटलं तरीही भाजपला नवा अध्यक्ष निवडता आलेला नाही. या पदासाठी अनेक दिग्गज नेत्यांची नावं चर्चेत आहेत. भाजप आणि राष्ट्रीय स्वयंसेवक संघातील सुत्रांनी दिलेल्या माहितीनुसार, महाराष्ट्रातील दिग्गज नेत्याकडे पक्षाध्यक्ष पदाची धुरा दिली जाऊ शकते.
केंद्रीय मंत्री धर्मेंद्र प्रधान यांच्याकडे बिहार विधानसभा निवडणुकीची जबाबदारी देण्यात आली आहे. प्रधान यांच्याकडे बिहारचा प्रभार असल्यानं त्यांचं नाव अध्यक्ष पदाच्या शर्यतीतून बाहेर गेलं आहे. धर्मेंद्र प्रधान यांच्यासोबतच भूपेंद्र यादव यांचंही नाव अध्यक्ष पदाच्या शर्यतीत होतं. पण पक्षानं त्यांच्याकडे बंगाल विधानसभा निवडणुकीची जबाबदारी सोपवली आहे. त्यामुळे यादव येत्या काळात बंगालवर अधिक लक्ष केंद्रित करतील. त्यांच्याकडे भाजपचं अध्यक्षपद जाणार नाही, हेदेखील स्पष्ट झालं आहे.
भूपेंद्र यादव यांनी महाराष्ट्रात भाजप प्रणित महायुतीचं सरकार आणण्यात महत्त्वाची भूमिका बजावली होती. उद्धव ठाकरे यांचं सरकार उलथवण्यात त्यांचा वाटा होता. नितीन गडकरी अध्यक्ष भाजपचे अध्यक्ष असताना २०१० मध्ये यादव यांची राष्ट्रीय सचिव म्हणून नियुक्ती झाली. वादांपासून दूर राहणारे नेते अशी त्यांची ओळख आहे. पक्षात त्यांनी महत्त्वाची पदं भूषवलेली आहेत. २०१४ मध्ये अमित शहा केंद्रीय पातळीवर सक्रिय झाले. तेव्हापासून यादव हे शहांच्या टिममध्ये काम करत आहेत.
राष्ट्रीय स्वयंसेवक संघ आणि भाजपमध्ये उत्तम समन्वय राहावा यासाठी महाराष्ट्रातून येणाऱ्या देवेंद्र फडणवीस किंवा नितीन गडकरी यांच्याकडे अध्यक्षपद सोपवलं जाऊ शकतो. दोन्ही नेत्यांचे संघाशी उत्तम संबंध आहेत. दोघेही नागपूरचे असून संघाच्या तालिमात घडले आहेत. गेल्याच वर्षी मुख्यमंत्री झालेल्या देवेंद्र फडणवीस यांच्या पाठोपाठ आता केंद्रीय मंत्री नितीन गडकरी यांचं नावही भाजप अध्यक्ष पदासाठी चर्चेत आहे.
नितीन गडकरी यांनी याआधी भाजपचं अध्यक्षपद भूषवलं आहे. डिसेंबर २००९ ते जानेवारी २०१३ या कालावधीत ते भाजपचे अध्यक्ष होते. सध्या त्यांच्याकडे रस्ते आणि वाहतूक मंत्रिपदाचा कार्यभार आहे. संघाच्या जवळचे असलेले गडकरी पहिल्या युती सरकारमध्ये मंत्री राहिलेले आहेत. २०१४ मध्ये ते केंद्रात मंत्री झाले. गेल्या ११ वर्षांत मोदी सरकारमध्ये अनेक बदल झाले. पण गडकरी यांचं मंत्रिपद आहे. मंत्रिपद टिकवणाऱ्या मोजक्या नेत्यांमध्ये त्यांचा समावेश होतो.
